Presidente sang vendors association sa Iloilo Terminal Market, nagpangabay sa Iloilo City government nga pasugtan ang mga daan nga ruta nga makalabay sa merkado sa pagpatuman sang LPTRP

ILOILO CITY — Nagpangabay si Mr. Dante Mangalisan, presidente sang New Iloilo Terminal Market Vendors Association sa Iloilo City Government nga pasugtan ang mga daan nga ruta sa siyudad nga makalabay sa terminal market bisan gin-implementar na ang Local Public Transport Route Plan ukon LPTRP sa siyudad.

Ginpahayag ni Mangalisan nga huol para sa mga manugbakal kag vendors ang indi paglabay sang pila ka daan nga ruta sa terminal market.

Sa subong suno kay Mangalisan, Baluarte kag Calumpang nga mga jeep na lang ang nagalabay sa terminal market kag wala na ginapasugtan nga makalabay ang Mandurriao, La Paz, Jaro Liko kag Timawa nga jeep.

Kun magalawig pa ini dugang ni Mangalisan, maputo ang mga vendors sa terminal market bangud wala na sang may maninda sa merkado.

Ang malain pa gid suno kay Mangalisan antes gin-implementar ang LPTRP wala gid sila ginkonsulta nga mga vendors.