Mga bag-o nga ruta nga ipatuman sa LPTRP, wala na-istoryahan sa konsultasyon sang Iloilo City government sa mga transport cooperatives
ILOILO CITY – Pasado na ang ordinansa sang Iloilo City Council may kaangtanan sa Local Public Transport Route Plan (LPTRP) antes nakita sang Metro Iloilo Transport Cooperative (MITSCOOP) ang mga bag-o nga ruta.
Ini ang ginpahayag ni MITSCOOP Chairman Josemarie de los Reyes gani nakibot sila nga may mga alokasyon na kun pila ka units sang depasahero nga jeep sa kada ruta.
Gin-ako ni de los Reyes nga may konsultasyon gid man nga ginhimo ang Iloilo City Government sang nagligad nga tuig pero wala naistoryahan ang mga bag-o nga ruta nga ipatuman sa LPTRP.
“Last May [2022] nagpahayag na ako sa [Iloilo] City Government that we are supposed to suspend this ordinance or the implementation of LPTRP just because indi pa gid ni klaro sa amon especially ang mga stakeholders ta, ang mga commuters ta – damo pa tani nga consultation ang matabo sini before the implementation,” suno kay de los Reyes.
Antes ang implementasyon, nagpadala ang MITSCOOP sang sulat kay Mayor Jerry Treñas nga kun puwede indi anay pag-fully implement ang LPTRP pero nadayon gid ini sang Hunyo 12.
