Magnobya, pilason sang nakabunggo ang ginasakyan nga motorsiklo sa baka nga nahigda sa tunga sang karsada sa Arevalo
ILOILO CITY — Gindala sa ospital ang magnobya nga sakay sang motorsiklo nga nakabunggo sa nagahigda nga baka sa Barangay Sooc, Arevalo las 4:15 kahapon sang kaagahon, Hunyo 21.
Ginkilala ang driver sang motorsiklo kay Gilbert Bayot, 31-anyos nga may gasgas sa nagkalain-lain nga parte sang iya lawas.
Samtang gindala sa ospital ang nobya niya nga backrider nga si Moira Rubino, 26-anyos nga may lagub sa likod sang iya ulo.
Suno kay Police Staff Sergeant Joey Lopez, traffic investigator sang Molo kag Arevalo Police Station halin sa direksyon sang Oton ang magnobyo kag idul-ong kuntani si Rubino sa JV Jocson, Arevalo.
Wala makita ni Bayot ang baka nga nagahigda sa tunga sang karsada.
Sa panaysayon ni Bayot tatlo (3) ka mga baka ang ara sa karsada.
Suno naman kay Police Major Chin Tanagras nga madugay na nga concern sa area sang Sooc ang mga baka nga ara sa tunga sang karsada. Apang nasulusyonan na nila ini bangud wala na sila sang impormasyon nga nabaton nga may mga baka pa sa gihapon sa tunga sang karsada.