Responder sang MDRRMO Zarraga, patay sang gintiro sang manghod sang iya live-in partner sa Badiangan; Suspek, nag-surrender
ILOILO — Patay ang driver/responder sang MDRRMO-Zarraga sang gintiro sang manghod sang iya live-in partner sa Brgy. Agusipan, Badiangan las-4 kahapon sang hapon, Hunyo 23.
Ginkilala ang biktima kay Kim Gerada, 32-anyos sang Jalaud Norte, Zarraga.
Suspek amo si Ricardo Prodigo III nga taga-Agusipan, Badiangan.
Suno kay PLT Ma. Rosario Miranda, OIC sang Badiangan Municipal police station, antes natabo ang insidente, nagahampang ang biktima sang baraha upod sa pamilya sang iya live-in partner sang gulpi lang ginpalapitan sang suspect kag gintiro.
Ginpahayag ni Miranda nga tatlo pa lang ka adlaw sang nagkadto sa lugar ang biktima upod sa iya nga partner agud temporaryo nga magtenir.
Base sa imbestigasyon sang pulis, wala sang may gin-awayan ang suspect kag ang biktima rason nga wala pa sang may matumod nga motibo sa krimen
Gindala pa sa ospital ang biktima pero gindeklarar nga napatay bangud sang pilas sa nagkalainlain nga parte sang lawas.
Na-recover sa lugar ang apat ka empty shell sang 45 caliber.
Nag-surrender naman sa Badiangan police ang suspetsado matapos nga ginkumbinser sang iya pamilya.
Suno kay Police Lieutenant Ma. Rosario Miranda, hepe sang Badiangan Police Station, tatlo pa lang ka adlaw nga nagtiner sa Agusipan ang biktima kaupod ang iya live-in partner kag duha nila ka bata.
Ginapadalman sang Badiangan police ang motibo sang suspect sa pagpatay sa biktima samtang ginapreparar ang kaso nga murder. — via Aksyon Farrah Mae Morano
