Mga unibersidad kag kolehiyo sa Iloilo City, nagareklamo sang huol, gasto kag kalawigon sang biyahe para sa ila mga estudyante sa idalum sang LPTRP
ILOILO CITY — Ginsapol ni Mayor Jerry Treñas kaupod ang City Planning and Development Office, kag PSTMO ang mga unibersidad kag kolehiyo sa syudad angut sa implementasyon sang Local Public Transport Route Plan.
Sa consultation, nag-ugyon ang mga eskwelahan partikular na ang John B. Lacson Foundation Maritime University, University of the Philippines-Visayas, Colegio de San Jose, kag St. Therese MTC Colleges nga sugod sang ginpatuman ang LPTRP, nagdugang ang gasto sa pamasahe sang mga estudyante nga nagatambong sa face-to-face classes, kag naglawig pa ang ila byahe.
May mga ginpalab-ot man sa talatapan sang mga eskwelahan nga naga-doble ukon triple pa ang pagsakay sang mga estudyante.
Ginahingyo sang mga eskwelahan ang City Government nga ikonsiderar ang comfort, convenience, kag safety sang publiko.
Suno sa mga representante nga ginpamangkutan sang Aksyon Radyo, ini ang una nga kahigayunan sang City Government nga nagkonsulta sa ila angut sa pagpatuman sang LPTRP.
