Transport cooperative, nakibot sa desisyon nga i-suspend temporaryo ang pagpatuman sang LPTRP
ILOILO CITY — Gin-ako ni Western Visayas Transport Cooperative (WVTC) President Raymundo Parcon nga ginkakibot nila ang temporaryo nga pag-suspend sang Local Public Transport Route Plan (LPTRP) sang Iloilo City Government.
Suno kay Parcon, amat-amat na kuntani nahatagan sang solusyon ang mga nagtuhaw nga problema sugod nga ginpatuman ang LPTRP sang Hunyo 12. Kada Lunes suno sa iya nagahimo sila sang adjustments agud mapahagan-hagan ang problema.
Pero sa pihak sini, nagapasalamat ang WVTC nga temporaryo nga ginsuspendir ang LPTRP bangud ginpamatian ang panawagan sang mga stakeholders ilabe na ang mga commuters.
Nagalaum si Parcon nga mahatagan gid sang tul-id nga solusyon ang mga nakita nga problema sa LPTRP samtang gina-suspendir ini kag maplastar sang maayo ang mga ipatuman nga ruta agud indi mahul-an ang mga pumuluyo.
“Nakibot kita nga hinali lang gin-suspend ni Mayor [Jerry Treñas ang LPTRP]. Nagapasalamat kita kay gin-suspend ni mayor agud to ma-correct ini’ng mga problema sa 45 diyas. Kabay pa nga sa pag-implement liwat matapos ang tanan nga problema, kag masolusyonan, kag matun-an maayo sang [city government],” suno kay Parcon.
Sa pag-epekto sang temporary suspension sa Hulyo 8, ibalik ang mga daan nga ruta sa siyudad.