3 ka venues sa Iloilo City, hiwatan sang voter registration para sa 2022 BSKE
ILOILO CITY — Tatlo ka mga venues sa siyudad sang Iloilo ang hiwatan sang voter registration sang City- Commission on Elections sa pagpadayon sang registration para sa 2022 Barangay and Sangguniang Kabataan elections.
Ginpahayag ni Mr. Jonathan Sayno, Election Assistant II sa Iloilo City Comelec nga dapat mangin malapad ang lugar para sa registration bangud yara pa gihapon ang presensya sang COVID-19.
Sugod buwas tubtob Hulyo 9, himuon ang voter registration sa Iloilo City Comelec Office sa City Proper. Sa ikaduha nga semana sang registration ukon halin Hulyo 11 tubtob 16, himuon naman ini sa SM City, Mandurriao; kag ang halin Hulyo 18 tubtob 23 ang himuon naman sa Festive Walk Mall sa Megaworld, Mandurriao.
Wala sang registration kada Domingo, suno kay Sayno. Bukas ang registration halin las-8 sang aga tubtob las-5 sang hapon.
Mahimo nga ma-download ang application forms para sa registration, lakip na ang transfer sang voter registration, reactivation, change or correction entries subong man reinstatement para sa mga nakakas sa voter’s list, sa website sang Comelec, www.comelec.gov.ph.. — via Akssyon Hotline