JR Gasoline Station sa Sta. Barbara, Iloilo, ginhold-up; Suspects nga driver, conductor sang E-bus, yara na sa kustodiya sang kapulisan
ILOILO – Ginhold-up ang JR Gasoline Station sa Barangay Balibagan Este, Sta. Barbara kagab-i, Hulyo 2.
Ginkilala ang mga tagreklamo kanday Flomar Joy Balayo, 29, sang Balibagan Este, Sta Barbara nga cashier; kag Sandra Cartagena, 28, sang Brgy. Bagacay, San Rafael nga empleyado sang gasolinahan.
Suno kay Police Major Fernan Limbungan, hepe sang Sta. Barbara Police Station, nakapanirado na ang gasolinahan sang nag-abot ang duha ka mga lalaki nga naga-angkasanay sa motorsiklo. Nagpanaug ang angkas kag nagpalapit sa cashier tubtob nga nagdeklarar sang hold-up.
Nakatuad pa suno sa mga tagreklamo ang suspek nga “hipos lang kamo, kwarta lang amon.” Ginabanta P20,000 nga cash ang nakuha sang mga suspetsado nga benta sang gasolinahan.
Ginkilala naman ni Limbungan ang mga suspetsado kanday Alex Alvarez, 33, sang Barangay Sta. Clara, Oton kag Edmark Dela Cruz, 32, sang Brgy. Tacas, Jaro.
Base sa imbestigasyon sang Sta. Barbara police, antes natabo ang pagpanghold-up, wala nagtrabaho ang duha kag ginpahayag nga ginprenda ni Alvarez ang motorsiklo ni De la Cruz sa balor nga P10,000. Ginpartida sang duha suno kay Limbungan ang kwarta bangud gingamit nila sa sugal sa namatyan.
May mga ginpang-utangan man suno sa iya ang duha nga ginapatihan rason sang pagpanghold-up sa gasolinahan.
Sang gin-report ang insidente, gilayon nga nag-conduct sang hot pursuit operation ang Sta. Barbara police kag nakabaton sila sang impormasyon halin kay Police Lieutenant Rene Mercado sang San Miguel Police Station nga may natiruhan nga lalaki nga ginhulog sa motorsiklo sa Barangay Malawog, Sta. Barbara.
Gilayon nga gindala ang pilason sa Western Visayas Sanitarium and General Hospital.
Gindala sang Sta. Barbara police ang mga empleyado sang gasolinahan sa ospital kag gintudlo nila nga ang pilason nga lalaki nga amo nag-hold up sa gasolinahan. Si Alvarez ang napilasan sa paa kag naka-hospital arrest.
Na-recover sa iya ang bag nga may unod nga cash nga P22,108.
Nag-surrender naman sa Jaro Police Station si De la Cruz kag gin-turn over na sa Sta. Barbara police.
Ginsugid ni De la Cruz sa kapulisan nga sang nagpalagyo sila, ginsulod ni Alvarez sa bag ang .38 caliber revolver kag naglupok ini. Nagdumdom siya nga mapatay si Alvarez rason iya ginbayaan.
Natalana nga pasakaan sang kaso ang mga suspetsado. — via Aksyon Kikik Enar