Nagaprenda sang ATM card, naga-inom, nagasugal, pila sa mga reklamo nga mabaton sang barangay batok sa pila ka 4Ps beneficiaries — City Proper ABC Pres. John Eric David
Gin-isa-isa ni City Proper ABC President kag Veterans Village Punong Barangay John Eric David ang mga reklamo nga ila mabaton batok sa pila ka mga 4Ps beneficiaries sa ila barangay.
Suno kay Kap. David, indi malikawan nga may mga beneficiaries kun kaisa nga naga-inom kag nagasugal. May mga impormasyon man sila nga nabaton nga may iban nga ginaprenda ang ila mga ATM card.
Ginpaathag ni David nga indi ma-aksyunan sang barangay ini nga mga reklamo kag dapat nga sa DSWD gid ini ipalab-ot. Ginpahayag niya man nga wala sang kahilabtanan ang barangay sa pagpanglista sang mga kwalipikado nga mga benepisyaryo.
Ang taga-DSWD suno sa iya ang nagapang-house-to-house para manglista. Wala man sang kopya nga ginahatag sa ila ang taga-DSWD kun sanday sin-o ang mga nakasulod sa ila listahan.
Dugang pa ni David, handa man nga magbulig ang ila barangay kun maghingyo ang DSWD agud ma-validate kun sin-o ang mga qualified beneficiaries kasunod sang anunsyo ni DSWD Sec. Erwin Tulfo nga tinluan ang listahan sang mga benepisyaryo.
