30-anyos nga lalaki, nakuhaan sang pusil sa Molo
ILOILO CITY — Nakuhaan sang pusil ang 30-anyos nga lalaki sa saturation drive sang Molo police sa Calumpang, Molo kagab-i, Hulyo 16.
Ginkilala kay John Dave Maprangala sang Zone 7 Calumpang, Molo ang nakuhaan sang pusil.
Suno kay Police Master Sergeant Rudelyn Astros, naga-conduct ang mga kapulisan sang saturation drive sang nagsulod sila sa balay ilimnan sa amo nga Barangay.
Nakuha sa sulod sang bag ni Maprangala ang .45 kalibre nga pusil kag mga bala nga nakasulod sa magazine.
Base sa pagpangusisa sang police kay Maprangala, ginsugid niya nga miyembro siya sang force multiplier, pero suno sa police wala pa nila nakilala ang grupo nga ginatumod sang subject.
Gintinguhaan sang Aksyon Radyo news team nga makuhaan sang pahayag si Maprangala apang nagpamalibad siya nga magpa-interview.
