Lima, arestado sa ginamo sa sulod sang resto bar sa Mandurriao
ILOILO CITY — Arestado ang lima ka indibidwal nga involved sa ginamo sa sulod sang Amnesia Resto Bar sa 162 Benigno Aquino Ave, Mandurriao, Iloilo City, las-3 sang kaagahon sang Hulyo 26.
Suno kay Plt. Lester Oliveros, OIC sang Mandurriao Police Station, wala nag-intindihanay ang duha ka grupo rason sang ginamo.
Duha ka lalaki kag isa ka babaye ang sa pihak nga grupo kag duha ka lalaki sa pihak naman nga grupo.
Base sa imbestigasyon sang pulis, nagpangdupla ang pihak nga grupo nga upod sang babaye, sa duha ka mga lalaki.
Magluwas, sini naghaboy man sang botelya ang babaye kag na-igo sa kristal.
Ginpahayag man sang pulis nga may nagkalain-lain nga alegasyon ang duha ka grupo.
Ginabanta sa P60,000 ang balayran sang apat lakip ang damaged sang bar kag ila mga ginpang-inom.
Suno kay Mr. Nestor Espinosa, tag-iya sang amo nga bar may mga lihok sila nga ginahimo para indi na maliwat ang ginamo.
Dugang pa niya nga ini ang una nga bes nga may natabo nga ginamo sa sulod sang bar.
