2 days LTOPF Caravan, hiwaton sang ICPO para sa mga gun owners nga wala pa makaparehistro sang ila pusil
ILOILO CITY — Maga-conduct sang duha ka adlaw nga License to Own and Possess Firearms (LTOPF) caravan ang Iloilo City Police Office (ICPO) sa Agosto 4 tubtob 5.
Hiwaton ini sa SM City Iloilo cinema area kag mangin available sa tiun sang mall hours.
Bukas ang caravan sa tanan nga mga gun owners nga taga-siyudad kag probinsiya sang Iloilo lakip na sa mga kaiping nga mga probinsiya.
Katuyuan sini nga mahaylo ang mga tag-iya sang pusil nga makaparehistro sang ila armas kag makakuha sang LTOPF suno kay Maj. Shella Mae Sangrines, spokesperson sang ICPO agud nga indi sila ma-subject sa mga police operations.
Ginpaathag ni Sangrines nga mangin one-stop-shop ini gani mas madasig kag mas mahapos ang pagproseso bangud indi na kinahanglan pa sang mga gun owners nga magkadto sa lain-lain nga mga opisina para magkuha sang national police clearance, neuro kag drug test.
Kinahanglan lang nga magdala sang mga dokumento kasubong sang government issued ID, picture, kag proof of billing sang mga luyag magkadto sa caravan.
Ini nga programa, inisyatibo sang ICPO kaupod ang Regional Civil Security Unit 6 kag mga miembro sang advisory council sang ICPO. — via Aksyon Khenjo Terco