Mga bag-o nga personalidad may kaangtanan sa illegal drugs nga na-monitor sa Bakhaw, Mandurriao, lunsay mga pangayaw suno kay PB Joel Alvarado

ILOILO CITY – Mga pangayaw ang bag-o nga mga personalidad nga na-monitor sang mga barangay officials sang Bakhaw, Mandurriao may kaangtanan sa illegal nga druga.

Kasunod ini sang pag-request sang barangay sang presensiya sang kapulisan bangud sa amat-amat nga pagbalik sang illegal drug activities sa lugar suno kay Punong Barangay Joel Alvarado.

Indi pa matumod ni Alvarado kun may balay nga ginapulian sa ila barangay ukon naga-board lang ang gintumod niya nga mga personalidad.

Ginpahayag ni Alvarado nga nag-ugat ang pag-request nila sang police sang na-obserbaran nila nga madamo sang indi pamilyar nga mga tawo nga nagaguwa-sulod sa ila barangay ilabi na kun kaagahon.

Dugang niya, wala man nalakip sa ila Barangay Anti-Drug Abuse Council (BADAC) list ang mga personalidad nga ila na-monitor. Posible suno sa kapitan nga nagabakal sang illegal nga druga ukon nagahimo sang illegal nga buluhaton ang mga tawo nga nagakadto sa ila barangay.

Sang 2019 pa ang pinakaulihi nga drug buy bust operation sa Brgy. Bakhaw suno kay Alvarado.