Lalaki nga nangawat sa City Proper, nag-ako nga siya ang tag-iya sang motorsiklo nga nabilin sa barracks sa Oton nga gintuyo kawatan
ILOILO CITY — Gindakop sang City Proper police ang 30-anyos nga lalaki nga ginreklamo nagpangawat sa canteen sang Iloilo Fishing Port Complex sa Brgy. Tanza Baybay kahapon sang kaagahon, August 8.
Ginkilala ang lalaki kay Mark Harold Palma sang Barangay North Baluarte, Molo.
Suno kay Police Major Shella Mae Sangrines, hepe sang City Proper Police Station, ginlaragway sang tagreklamo ang nakita niya nga nagpangawat rason nga gilayon nga nag-conduct sila sang hot pursuit operation kag nadakpan si Palma.
Ginkumpirmar man sang tagreklamo suno kay Sangrines nga si Palma ang nakita niya nga nagpangawat.
Ginbuyagyag ni Sangrines nga madugay na nila nga gina-monitor si Palma bangud may records man siya sadto sang pagpangawat sa syudad.
Base sa reklamo, P7,650 ang nakuha sang nagpangawat lakip man ang P1,160 nga balor sang sigarilyo kag cellphone suno sa tagreklamo.
Sa dugang nga imbestigasyon sang pulis, natukiban nga si Palma ang nagapanag-iya sang motorsiklo nga ginbilin sa barracks sa Pakiad, Oton nga gintuyo kawatan kahapon.
Gin-ako ni Palma suno kay Sangrines nga iya ang motorsiklo, pero nagdepensa nga ginbaligya na niya.
Ginpabutyag ni Sangrines nga madamo man sang nagareklamo nga ginkawatan sa syudad kag Oton nga naga-anggid sa nawong ni Palma ang suspect base sa mga CCTV camera footage.
Magluwas diri, base sa record sang Police Station 1, nadakpan man si Palma sa drug buy bust operation sang 2018 kag subong lang nga tuig nakagwa sa presuhan. | with additional information from Aksyon Angel Mae Ciudad