Pagsulod sang first town jeepneys sa Iloilo City, na-istoryahan sa LPTRP consultation sang city government sa provincial government

ILOILO – Nahisugtan sang Iloilo City Government kag Iloilo Provincial Government nga pasudlon sa siyudad ang mga first town jeepneys sa konsultasyon nga ginhimo may kaangtanan sa Local Public Transport Route Plan.

Suno kay Mr. Mario Nillos, head sang Provincial Planning and Development Office sang Provincial Government, “Nag-agree kami in principle nga ang first town [jeepneys] makasulod sa siyudad. Siguro before Friday ma-finalize gid namon ang ruta kag number of fleet nga pasudlon. Ang plano, pasudlon ang first towns —diri sa north ang Leganes, sa central [ang] Pavia kag diri sa South ang Oton.”

Nagapasalamat si Nillos nga liwat nga ginkonsiderar sang City Government ang pagpasulod sang first towns sa siyudad. “Nakita naton sa survey nga kadaku sang demand from first towns nga nagasulod sa siyudad. Na-displace gid ang mga pasahero naton sa first towns. Nakita naman and naistoryahan nga pasudlon naton ang first towns. Ang issue na lang is ang fleet size.”

Madumduman nga sa una nga pagpatuman sang siyudad sang LPTRP sang Hunyo 12, 2022, wala gintugtan nga magsulod sa siyudad ang tanan nga provincial jeepneys lakip na ang mga halin sa first towns. Nagresulta ini sa pagwangal sang madamo nga pasahero halin sa probinsya bangud nagdoble kag nagtriple ang ila sakay antes makalab-ut sa ila kaladtuan sa siyudad.

Sang amo nga tiun, ginpa-athag ni Public Safety and Transportation Management Office head Jeck Conlu sang City Government nga tubtob lang sa terminals ang mga provincial jeepneys base sa guidelines sang Land Transportation Franchising and Regulatory Board.

Hulyo 8, 2022 sang temporaryo nga ginsuspender ni Iloilo City Mayor Jerry Treñas ang implementasyon sang LPTRP sang siyudad kag ginmandu ang konsultasyon sa nagkalain-lain nga sektor.

Magatakop sa Agosto 25 ang 45 ka adlaw nga temporary suspension sang LPTRP. –via Aksyon Hotline