2 pilason lakip ang 5 ka bulan nga lapsag sang nabungguan sang L300 van sa Badiangan

ILOILO — Gindala sa ospital ang lima ka bulan nga lapsag kag ang nagakungkong sa iya sang nabungguan sang L300 van sa Barangay Cabayogan, Badiangan, kaina sang hapon.

Napilasan sa guya kag ulo ang lima ka bulan nga lapsag samtang nagreklamo sang pagpalanakit sang iya abaga si Rochelyn Zambra.

Suno kay PSSg Charlie Glenn Casador, imbestigador sang Badiangan Police Station, wala gilayon matalupangdan sang driver nga si Jaypee Casio sang Barangay Magsaysay, City Proper ang mga biktima samtang nagalakat sa karsada.

Natumba si Zambra rason nga nabuy-an niya ang lapsag nga iya ginakungkung.

Gin-custody sa Badiangan Police Station si Casio.