20-anyos nga babaye nga gin-report gin-abduct sa Estancia, natukiban nga nagahimu-himo lang sang istorya

ILOILO — Natukiban nga nagahimu-himo lang sang istorya ang 20-anyos nga babaye nga gin-report gin-abduct sa Estancia sang Agosto 28 sang gab-i sa Estancia.

Ini ang nagguwa sa imbestigasyon sang Iloilo Police Provincial Office kay alyas Nene nga nag-ako sang ulihi nga indi matuod ang post sa social media may kaangtanan sa iya abduction.

Ginpahayag ni IPPO spokesperson PSMS Francisco Lindero nga una na gin-claim ni Nene nga may lalaki nga nagpwersa sa iya nga magpasakay sa tricycle mga las 6:30 sang gab-i.

May tabon suno sa iya sang tela ang hitsura sang lalaki nga nagtuyo mag-abduct sa iya.

Ginsugid ni Nene nga nadulaan siya sang pangalibutan pero nakabugtaw siya sang ulihi kag nakapalagyo.

Apang sa pagpangusisa sang IPPO, natukiban nga himu-himo lang ni Nene ang istorya agud may “alibi” sa iya amay nga nagapangita sa iya.

Nagguwa sa imbestigasyon nga wala naglisensya si Nene sa iya amay sang nagbiya siya sa iya amo.

Si Nene ang residente sang Carles kag naga-obra bilang timbang sa sulod sang balay sa Estancia.