9 ka tuig nga bata nga napatay sa diarrhea sa Calumpang, Molo, wala gilayon madala sa ospital sang naglain ang pamatyag

ILOILO CITY — Napatay sa diarrhea ang siyam (9) ka tuig nga bata nga babaye nga taga-Calumpang, Molo.

Suno sa amay nga si Randel Bayot, Agosto 19 sang nagkadto sa Sooc, Arevalo ang iya bata nga si Maymay agud magkaon sang kasag upod ang iya mga tiya.

Agosto 20 sang kaagahon suno sa iya sang naglain ang pamatyag sang bata, nagpalanuka kag gin-LBM.

Gin-ako ni Randel nga wala niya madala gilayon sa ospital ang bata kag ginpa-inom lang sang oral rehydration salts kag ginpakaon sang linugaw sa ila balay.

Naumpawan man suno sa iya si Maymay.

Mga las 10 sang aga sa amo man nga petsa sang ginpahibalo si Randel nga nagapalangluya na gid ang iya bata.

Gindala pa suno sa iya sa ospital si Maymay apang gindeklarar nga dead-on-arrival.

Naghambal ang attending physician nga dehydrated ang bata kag may diarrhea.

Indi naman makapat-od si Randel nga kasag ang ginhalinan sang paglain sang pamatyag sang iya bata.

Halin sa water refilling station ang gina-inom nga tubig sang pamilya ni Randel kag wala man naglain ang pamatyag sang iban niya nga kabataan.

Nagabiyahe sang trisikad si Randel kag nagatrabaho man bilang construction worker samtang yara naman sa abroad ang iya asawa.

Gin-schedule sa Setyembre 7, las 9 sa aga ang lubong ni Maymay suno kay Randel.