Arrest warrant vs former Monica-Blumentritt, City Proper Punong Barangay Dabing Espinosa, may kaangtanan sa pag-raid sa ila balay sang 2016

ILOILO CITY – Nagbalibad nga magpirma nga testigo si former Monica-Blumentritt, City Proper Punong Barangay Keith “Dabing” Espinosa sang gin-raid ang ila balay sang Oktubre 2, 2016.

Ini ang background sang kaso batuk kay Espinosa upod kanday former Barangay Kagawad Arturo Atinado kag former Barangay Kagawad Amadeo Atinado nga may warrant of arrest sa kaso nga paglapas sa REPUBLIC ACT NO. 3019. ANTI-GRAFT AND CORRUPT PRACTICES ACT nga gin-issue sang Setyembre 1, 2022.

Suno kay incumbent Kagawad Arturo Atinado Jr., “[Ang arrest warrant] regarding ni sa raid sa balay ni Kap Dabing Espinosa [sang 2016]. Waay ni sila naka-witness sa pagsulod sa balay ni Kap Dabing tungod ang tanan nga recoveries waay ni nila nakit-an kun diin ginpangkuha.”

Gin-athag ni Atinado nga ang amay niya ang nakabutang sa warrant kag indi siya. Pero 2019 pa napatay ang iya amay. “Clarify ko lang nga sang January 1, 2019, napatay si tatay ko [anay Kagawad Arturo Rafio Atinado nga isa sa mga subjects sang warrant]. Nakakuha na kami sang death certify kag naka-verify naman ang DILG.”

Suno naman kay Punong Barangay Antonio Espinosa, wala siya nakahibalo kun diin si former Kapitan Espinosa nagatenir halin sang nag-resign sang 2018. Nagkitaay lang sila, suno sa iya, sa Police Station 1 sang Sabado, Setyembre 3, sang nag-surrender ang anay kapitan.

Una na ginsaysay ni PMAJ Shella Mae Sangrines, hepe sang Police Station 1, nga gin-release man si Espinosa matapos nagpiyansa sang P90,000 sang Sabado.

Si former Kagawad Amadeo Atinado naman ang nadakpan sang 2017 sa anti-illegal drug operation kag napreso. Pero wala naman sang ideya ang taga-Monica Blumentritt kun diin na siya subong matapos nahilway.  – via Aksyon Hotline