3 patay sang ginpangtiro sa salakyan sa Estancia
ESTANCIA, Iloilo – Tatlo ang patay sang ginpangtiro sang wala pa makilal-an nga mga suspect sa Brgy Villa Pani-an, Estancia.
Ginpahayag sang Estancia police nga mga las-12:37 sang kaagahon sang nakabaton sila sang tawag nga may shooting incident sa amo nga lugar.
Dead-on-arrival sa ospital ang mga sakay sang Isuzu MUX nga kanday John Paul Bosque, 28-anyos sang Devera, Sara pero may balay man sa La Paz, Iloilo City; Floyd Fernandes sang La Paz kag Mark Libao sang Tacas, Jaro.
Si Bosque ang may igo sang bala sa tuo nga guya kag dughan. May duha ka pilas sa wala nga parte sang dughan kag wala nga tiil si Fernandes. Samtang may igo sa agtang sa ibabaw sang wala nga kilay, tuo nga guya kag tuo nga abaga si Libao.
Sanday Bosque kag Libao ang nakuha sa sulod sang salakyan, samtang sa talamnan na nakita si Fernandes.
Una na gin-report nga nakapalagyo si Jevron Parohinog sang Villa Pani-an nga kaupod sang mga biktima sa salakyan pero yara na sa police custody.
Ginsaysay ni Parohinog sa Estancia police nga siya ang naga-drive sang salakyan ni Bosque sang ginpadulugan sila sang mga suspek tubtob natabu ang pagpangtiro. Ginpabutyag man ni Parohinog nga business partners kag mga abyan niya ang mga biktima.
Ginbuyagyag ni Parohinog nga ginbaligya nila ni Bosque ang ila fishing boat sa balor nga P7 million agud makabayad si Bosque sang iya utang. Pero wala nakahibalo si Parohinog kun kay sin-o may utang si Bosque.
Ginmandu ni Iloilo Police Provincial Office Director PCOL Adrian Acollador ang ma-id-id nga pag-imbestigar sa natabu.
