PA-AKSYON | Mga pamatan-on nga nagasimhot sang rugby kag nagapanghaboy sang bato sa mga pamalay sa San Juan, Molo, ginareklamo

ILOILO CITY — Ginareklamo sang pila ka mga residente sang Zone 1 B, Brgy. San Juan, Molo ang mga pamatan-on nga nagasimhot sag rugby kag nagapanghaboy sang bato sa mga pamalay.

Suno kay alyas Jay, madugay na ini nga concern sang mga residente malapit sa baybay pero subong lang na-aktuhan kag nakuhaan sang video ang pagpanghaboy.

Sa na-obserbaran niya, “gina-ubra nila pamahaw, panyaga, [kag] panyapon [ang pagsimhot sang rugby].”

Masobra sa tatlo ang nagatipon sa baybayon kag nagasimhot sang rugby nga ginalakipan sang mga pangayaw kag mga tumandok nga pamatan-on suno sa iya.

Bangud sini, nag-report sila sa barangay officials rason nga ginpatawag ang mga ginikanan kag ginpapirma sa kasulatan nga bantayan ang ila kabataan kag nagpromisa man nga indi na magliwat.

Tatlo ka pamatan-on ang na-identify suno kay Jay nga ginpatawag sang barangay.