‘Vertical displacement’ rason sang temporary closure sang Ungka Flyover – DPWH 6

ILOILO CITY – Ginatudlo sang Department of Public Works and Highways 6 nga rason ang “vertical displacement” sa temporaryo nga pagpasirado sang Ungka Flyover nga nagsugod sang Setyembre 18, 2022 sang udto.

Suno kay Engr. Al Fruto, DPWH 6 Assistant Regional Director , gin-obserbahan nila ang flyover sugod nga ginbuksan ang tanan nga lanes sang Setyembre 5 kag nakibot sila nga nagguwa sa ila gingamit nga instrumento nga may vertical displacement.

Ginpaathag niya nga ang vertical displacement ukon pag-usmod ang kalabanan nga nagakatabu bangud sa kabug-aton sang isa ka flyover. Pero minimal lang suno sa iya ang nasambit nga problema nga nagakatabo sa mga flyovers.

Gindugang pa ni Fruto nga may yara sang tatlo sa 16 ka mga beams ang apektado sang vertical displacement.

Gilayon sila nga nagdesisyon nga pasiraduhan ang flyover agud padayunon ang obserbasyon kag makahimo sang rekomendasyon sa kontraktor. Gilayon sila nga mapaguwa sang time frame sa pagdihon sang solusyon sa nakita nga problema sa flyover. –via Cedrick Anona