Babaye nga nagtuyo magbaligya sang lapsag, dakup sa entrapment operation sang CIDG sa Molo
ILOILO CITY — Dakup sa entrapment operation sang Criminal Investigation and Detection Group (CIDG) ang 53-anyos nga babaye nga nagtuyo magbaligya sang lapsag sa Boulevard, Molo kahapon, Setyembre 20.
Suno sa CIDG 6, lima ka adlaw pa lang ang lapsag nga lalaki.
Ginpahayag ni Police Major Jess Baylon sang CIDG, may nabaton sila report nga nagabaligya sang lapsag gani nag-conduct sila sang validation tubtob ginhimo ang entrapment operation.
P40,000 ang ginkasugtan sang nagpakuno-kuno nga mabakal sang bata kag sang suspect nga si Ana Agustin, residente sang Zone 6 Boulevard, Molo.
Gin-athag man ni Baylon nga madugay na sila may nabaton nga impormasyon nga may nagabaligya sang bata, kag lapsag sa Iloilo City.
‘STATEMENT NI ANA AGUSTIN’
“Nagbulig lang ako.”
Ini ang ginpahayag ni Agustin sang gin-interview sang Aksyon Radyo Iloilo kasunod nga nadakpan sa entrapment operation sang CIDG.
Suno kay Agustin, nagpalapit kag nagpangayo sang bulig ang amay sang lapsag bangud manugbata si Alyas Ella nga iloy sang bata. Sa pagpa-athag ni Agustin nga ginbuligan niya nga mapabata si Ella.
Gindugang pa niya nga nagpangayo man sang bulig ang amay nga ipa-adoptar ang lapsag. Kasunod sini, gilayon siya nga nag-contact sa iya kakilala kag nakasugtan nga ibaligya sang P40,000 ang lapsag.
Gin-ako ni Ana nga siya ang naghatag sang amount nga P40,000 bangud ginpamangkot siya sang iya ka-text.
STAMENT SANG GINIKANAN SANG LAPSAG
“Ipa-adopt ko ang bata para mahatagan siya sang maayo nga puturo.”
Ini ang sabat ni Alyas Ella nga iloy sang lapsag. Pero suno sa iya nga wala siya nakahibalo nga ibaligya ang iya bata.
Ginsaysay ni Ella nga sang nagbata siya sang September 15 gindala na sa balay ni Ana ang lapsag.
Ginahatag ni Ella kay Ana ang lapsag bangud siya ang nagbayad sa pagbun-ag niya sa Lapuz sang P2,000 kag nakaguwa sa ospital.
Nakibot lang siya suno sa iya nagtawag si Ana nga mapadulong sa ila balay bangud may “buyer” na sang bata.
Gindugang pa ni Ella nga indi man pag-ihatag ni Ana sa iya ang bata.
Sa pagpangusisa sang Aksyon Radyo Iloilo, anum na ang kabataan ni Ella kag agot niya ang lima ka adlaw nga lapsag.
Pareho nga gin-aresto sanday Ana kag Ella kag natalana nga kasuhan sang CIDG.