4 patay sang nabungguan sang pick-up ang tricycle sa Miagao

ILOILO – Apat ang patay sang nabungguan sang pick-up ang tricycle sa Barangay Oyungan, Miagao las-8:15 sang gab-i sang Biyernes, Setyembre 23.

Ini ang ginkumpirmar ni Police Captain Marvin Buenavista, hepe sang Miagao Police Station sa interview sang Aksyon Radyo Iloilo.

Suno kay Buenavista, anum ang sakay sa tricycle sang natabo ang aksidente.

Ginkilala ang napatay kanday Bien Estorpe, 49, nga driver sang tricycle, iya asawa nga si Arlyn, 50, kag bata nila nga si Arbie, 10, nga lunsay residente sang Brgy. Igdulaca, Miagao, kag Helen Olaguer, 45, sang Brgy. Igcatambor, Miagao nga nakasakay man sa tricycle.

Samtang pilason kag padayon nga ginabulong sa ospital kanday Lance, 10, kag Allyza, 5, lunsay kabataan sang napatay nga si Olaguer.

Sa initial nga imbestigasyon sang Miagao police, pareho nga nagapadulong sa direksyon sang San Joaquin, Iloilo ang tricycle kag pick-up nga ginamaneho naman ni Noel Tactica, 25, sang Brgy. 5, San Joaquin, kag nagatrabaho sa Miagao LGU.

Ginalantaw sang Miagao police nga nadulaan sang control sa manibela ang driver sang pick-up rason nga nabunggu-an ang ginasundan nga tricycle.

Detained subong sa Miagao police station si Tactica nga nagpamalibad nga magpa-interview sang ginkuhaan sang pahayag sang Aksyon Radyo Iloilo News team.

NAKA-INOM SANG MAKAHULUBOG NGA ILIMNON

Naka-inom sang makahulubog nga ilimnon ang driver sang pick-up nga nakabunggo sa tricycle sa Brgy. Oyungan, Miagao.

Ini ang base sa medical certificate nga gin-issue sang doctor, suno kay PLt. Lunelyn Talamillo, deputy chief of police sang Miagao Municipal Police Station.

Napasakaan na sang kaso nga reckless imprudence resulting to multiple homicide, physical injury and damage to property ang driver sang pick-up.