Paghatag sang cash grants sa mga 4Ps beneficiaries sa W. Visayas temporaryo nga gin-hold

ILOILO — Temporaryo nga gin-hold sang Department of Social Welfare and Development (DSWD) 6 ang paghatag sang cash grants sa mga Pantawid Pamilyang Pilipino Program (4Ps) beneficiaries sa Western Visayas.

Ini ang ginpahibalo sang DSWD 6 bangud ginahulat pa nga matapos ang validation sang mga non-poor households, base sa resulta sang Listahanan 3.

Lakip sa maapektuhan suno sa ahensiya ang 87,728 ka panimalay kag ang sakop sang cash grants sang Hunyo- Hulyo ukon Period 3.

“Ginaklaro ka ahensiya nga ang pag-hold ka cash grants wala nagakahulugan nga automatic nga pagkakas sa programa,” suno sa DSWD 6.

Katuyuan sang nasambit nga lihok nga masiguro nga mapadayon gihapon ang nagakaangay nga serbisyo kag suporta sa mga kwalipikado nga benepisyaryo sang 4Ps.