#EstanciaKillings | Ice plant, balay ni Jevron Parohinog kag salakyan ni JP Bosque ginpaidalum sa luminol test
ILOILO — Gin-conduct ang luminol test sa balay ni Jevron Parohinog, lone survivor sa Estancia killings, sa Sitio Calumpang, Poblacion kagab-i, Setyembre 28.
Magluwas sini, gin-luminol test man ang ice plant nga ginapanag-iyahan nanday JP Bosque, Floyd Fernandes kag Jevron Parohinog nga ginapatihan gin-agyan nila antes natabu ang shooting incident sa Villa Panian.
Ang ice plant nahamtang malapit sa balay ni Parohinog.
Katapusan nga gin-luminol test ang Isuzu MUX nga ginsakyan sang apat.
Nag-umpisa ang luminol test las 8:00 sang gab-i kag natapos las 10:05 sang gab-i.
Ang pag-conduct sang luminol test kabahin sa ginahimo nga imbestigasyon sang Special Investigation Task Group (SITG) PALIBOSFER (Parohinog-Libao-Bosque-Fernandes.)
Katuyuan sini nga mahibaluan kun may iban pa nga crime scene sa pagpatay sa tatlo ka mag-abyan.
Ipaguwa sang SOCO ang resulta sang test sa sulod sang duha ka adlaw.
Ang luminol nga chemical, ginagamit sang mga forensic investigators agud ma-detect kun may dugo sa crime scene. Naga-react ini sa iron sa hemoglobin gani nga ma-detect kun may dugo bisan nga ginpahiran na.
Kun i-spray ang luminol kag may dugo (bisan indi makita ang dugo), naga-emit ini sang glow nga duag blue nga makita kun madulom ang lugar.