Preso nga nakapalagyo sa custodial facility sang San Dionisio Police Station, nadakpan sa Estancia
ILOILO – Nadakpan na si Aries Anabo, ang preso nga nakapalagyo sa custodial facility sang San Dionisio Police Station kahapon sang aga, Setyembre 28.
Ginkumpirmar ni Police Lieutenant Sobiet Torre, hepe sang San Dionisio MPS nga nadakpan si Anabo sa Barangay Poblacion, Estancia mga las-6:35 subong nga gab-i paagi sa joint operation nila kaupod ang Estancia police.
Suno kay Torre, pasado las-6 kaina sang aga sang natukiban sang naka-duty nga personnel nga wala na si Anabo sa sulod sang custodial facility.
Ginbingat ang rehas sang presuhan tubtob nga nakaguwa si Anabo.
Ginpasiguro man ni Torre nga imbestigaran nila ang on-duty personnel sang San Dionisio police kun ngaa nakapalagyo ang preso. Balik sa custodial facility sang San Dionisio MPS si Anabo.
Si Anabo ang nadakpan nga nag-carnap sang tricycle sang Setyembre 20 sa Barangay Tuble, San Dionisio.