Balay ni Jevron Parohinog, ice plant sa Sitio Calumpang, Poblacion, Estancia negatibo sa luminol test — SITG
ILOILO —
Nag-negatibo sa dugo sang tawo ang ice plant kag balay ni Jevron Parohinog, ang lone survivor sa Estancia killings sang Setyembre 14 sang kaagahon.
Ini base sa ginhimo nga luminol test sang SOCO sang Setyembre 28.
Wala man sang may nakita nga dugo sa container van sa sulod sang ice plant sa Sitio Calumpang, Poblacion, Estancia.
Samtang, may nakit-an nga gamay nga agsik sang dugo sa tuo nga kisame sang passenger seat sang salakyan sa diin nasapwan sanday Bosque kag Mark Libao.
Ang pag-conduct sang luminol test kabahin sa ginahimo nga imbestigasyon sang Special Investigation Task Group PALIBOSFER ukon Parohinog-Libao-Bosque-Fernandes.
Katuyuan sini nga mahibaluan kun may iban pa nga crime scene sa pagpatay sa tatlo ka mag-abyan.
Ang luminol nga chemical, ginagamit sang mga forensic investigators agud ma-detect kun may dugo sa crime scene. Naga-react ini sa iron sa hemoglobin gani nga ma-detect kun may dugo bisan nga ginpahiran na.
Kun i-spray ang luminol kag may dugo (bisan indi makita ang dugo), naga-emit ini sang glow nga duag blue nga makita kun madulom ang lugar.