Dash cam sang salakyan ni JP Bosque wala nagagana — SITG PALIBOSFER
ILOILO — Wala nagagana ang dash camera sang salakyan ni JP Bosque base sa resulta sang nagapadayon nga imbestigasyon sang Special Investigation Task Group PALIBOSFER.
Ang salakyan ni Bosque ang ginsakyan sang mag-abyan nga kanday Floyd Fernandes, Mark Libao nga ginpatay sa pagpangtiro sa Barangay Villa Panian, Estancia sang Setyembre 14 sang kaagahon.
Nakasakay man sa amo nga salakyan ang naga-isahon nga survivor nga si Jevron Parohinog.
Suno kay Police Senior Master Sergeant Francisco Lindero, spokesperson sang SITG, sa report sang Regional Cybercrime Unit 6 ukon RACU nga wala sang files nga nakuha sa dashcam sang salakyan.
Samtang, ma-request sang cyber warrant ang SITG bangud wala nakapasa sang iya consent si Parohinog sang ginpangayuan sang pulis agud i-examine sang RACU ang iya cellphone.