Container van nga may karga mantika, natumba sa Muelle Loney, City Proper

ILOILO CITY — Ginabanta sa 23 ka tonelada sang mantika ang nagdanaw sa karsada sang natumba ang container van sa Muelle Loney, City Proper.

Suno sa driver nga si Noel Kadaydayon sang Mandurriao, las-4 kaina sang kaagahon sang pakadto na siya kuntani sa Lapuz sang nakakas ang pin sang pwertahan sang van pag-abot sa Muelle Loney bridge.

Ginpahayag ni Kadaydayon nga wala man siya sang may nasugat-an nga salakyan ukon pedestrian sang natabo ang aksidente.

Masobra 20 na ka tuig nga naga-drive sang container van si Kadaydayon kag ini ang una nga tiun nga na-aksidente ang salakyan.

Samtang, madamo naman sang mga residente ang nagpangkandos sang mantika nga na-uyang sa karsada.

Apang gin-abisuhan sila sang taga-PSTMO nga kontaminado ang mantika kag indi safe nga lutuon ukon ibaligya.

Temporaryo naman nga ginsiraduhan sang taga-PSTMO kag CDRRMO ang dalan para sa mga motorista.