ArchivesUncategorized

3 ka kalabera sang tawo nga nasulod sa lain-lain nga sako, nasapwan sa Lambunao

ILOILO — Ginibahibalo pa sang Lambunao Police kag sang nga taga-SOCO ang identity sang tatlo ka mga kalabera sang tawo nga nasapwan nga nasulod sa lain-lain nga mga sako sa Bgry. Tranghawan, Lambunao kahapon sang aga, Oktubre 23.

Suno kay Maj. Jogen Suegay, hepe sang Labunao Police Station, mga las-10:30 sang aga sang may nagpahibalo sa ila nga may nasapwan nga mga kalabera sa banglid nga bahin sang nasambit nga barangay. Sa pagpati niya, hungod nga ginbutang kag wala lang ginhaboy ang mga sako nga may unod nga mga tul-an bangud nagatulupaday pa ang mga ini.

Indi pa matumod suno kay Suegay kun kasan-o ginbilin ang mga tul-an apang makit-an suno sa iya nga ginkalkal ang mga ini antes ginsulod sa sako kag ginbilin sa lugar. Wala man sang mga bayo nga nasapwan upod sa mga tul-an.

Gilayon nga nagpangusisa ang kapulisan sa mga residente sa palibot pero ila ginapahayag nga wala sila sang may napanimahuan antes pa man ini nasapwan.

Ginpahayag pa ni Suegay nga wala sang mga pamalay lugar nga ginbilinan sang mga tul-an kag ginahimo ini nga halabuyan sang basura sang mga tawo.

2021 sang may na-record ang Lambunao Police nga may na-missing nga mga tawo kag naga-coordinate na sila sa mga himata agud makabulig sa pag-identify sang mga tul-an nga nasapwan.

Gindala na sa punerarya ang mga tul-an kag posible nga ipalubong ini kun makuha na sang SOCO ang mga kinahanglanon sa ila imbestigasyon. Importante suno kay Suegay nga mahibaluan ang ginkamatay sang mga tul-an nga nakit-an.

aksyonradyoiloilo

Aksyon Radyo Iloilo is the No. 1 station in both AM and FM bands in Iloilo based on April and September 2023 and June 2024 Kantar Media surveys.

Leave a Reply