1 patay 9 ka estudyante kag 2 ka manunudlo sa Ajuy, Iloilo na-ospital bangud sa ginpahayag food poisoning
Napatay ang 17-anyos nga grade 11 student nga babaye sang Pili National High School sa Ajuy, Iloilo nga naglain ang patmatyag bangud sa ginpahayag food poisoning.
Ginkumpirmar ini ni Ajuy Mayor Jett Rojas. Suno sa alkalde, gindala pa sa Sara District Hospital ang estudyante kahapon, Nobyembre 5, kag nakapauli man sang naumpawan. Liwat nga naglain ang iya pamatyag kag ginhingagaw pa siya dala sa Barotac Viejo District Hospital apang wala nakalab-ot sa balay bululngan.
Base sa inisyal nga impormasyon nga nakuha ni Mayor Rojas, 15 ka mga estudyante kag duha ka mga manunudlo ang naglain ang pamatyag. 11 sa ila ang na-admit sa ospital lakip na ang duha ka mga manunudlo.
Una na gin-report nga may anum ka mga senior high school students nga ginpangdala sa Sara District Hospital kaina sang aga bangud nga naglain ang ila pamatyag.
Antes sini naghiwat sang United Nations Program ang Pili National High School sang Biyernes, Nobyembre 4. May boodle fight sa ila panyaga kag lakip sa ila mga ginpangkaon ang scallops, kasag, kag adobo nga baboy. Pagkatapos sang panyaga nag-inom pa sila sang buko juice.
Indi pa matumod kun ano gid ang rason sang paglain sang pamatyag sang mga estudyante.
Ginatinguhaan pa sang Aksyon Radyo Iloilo nga makuhaan sang pahayag ang pamunuan sang nasambit nga eskwelahan.
