‘Lain gid man ang gakatabu kun ara na ang [ASF nga] kaso’ –Iloilo Provincial Veterinarian Dr. Darel Rabuada
ILOILO – Wala nagkulang ang Provincial Veterinary Office sa pagpalapta sang impormasyon kag pag-edukar may kaangtanan sa African Swine Fever (ASF).
Suno kay Dr. Darel Tabuada, head sang PVO, madugay na nga nagahimo sang information dissemination campaign (IDC) ang ila opisina sa mga banwa kag barangay sa probinsya. “Before gin-igo kita sang ASF, massive na ang aton ang information dissemination campaign, per municipality and even barangay.”
Sa ginahimo nga IDC suno kay Dr. Tabuada, ginapa-athag sa mga hog farmers ang procedure sa depopulation ukon ang pagpatay sa mga baboy kun magsulod na ang ASF, ang risgu sang balatian kag ginapakita ang actual picture.
Naglain ang sitwasyon suno kay Tabuada sang nakasulod na sa probinsya ang ASF bangud, “may mga areas nga may hesitation, may mga farmers nga wala ga-cooperate.”
Base sa record sang PVO, lima ka banwa na sa probinsya ang naka-record sang ASF nga amo ang Oton, San Miguel, Alimodian, Leganes kag Santa Barbara. Gin-classify nga red zone ang Oton, San Miguel kag Leganes bangud duha ukon masobra pa ka barangay ang naka-record sang kaso, samtang pink zone pa ang pag-classify sa Alimodian kag Santa Barbara bangud isa ka barangay lang ang may na-record nga kaso.
Halin sang na-record ang ASF sa lima ka banwa, masobra 1,000 ka baboy na ang gin-depopulate bilang kabahin sang tikang nga indi na maglapta sa iban nga banwa ang virus.
Ginsuhestyun naman ang paghiwat sang ‘Lechon Festival’ sa mga pink zone areas. Paathag ni Provincial Tourism Officer Bombette Marin, tuyo sini nga ma-amat-amat ihaw ang mga baboy nga indi pa infected sang ASF. Antes ihawon kag pagkatapos ihaw, i-test ang baboy agud masiguro nga wala sang ASF virus antes lutuon. Ang Santa Barbara LGU pa lang ang nakasumiter sang proposal para sa Lechon Festival nga ila i-incorporate sa Kahilwayan Food Festival.
Sa data sang Philippine Statistics Authority antes naigo sang ASF ang Iloilo suno kay Tabuada, indi magnubo sa 86 percent sang swine industry ang halin sa backyard farms kag mga 14 percent lang ang halin sa commercial farms. –via Aksyon Hotline