Konduktor sang Ceres bus nga ginreklamo sang estudyante nga kulang ang ginkambyo sa iya suspendido

ILOILO – Ginsuspender sang management sang Vallacar Transit ang konduktor sang Ceres bus nga ginreklamo sang estudyante nga P30 lang imbes nga P430 ang ginkambyo sa iya sang nagsakay siya halin sa Anilao pa-Ajuy kahapon, Nobyembre 14.

Suno kay Vallacar Transit Media Relation Officer Jade Marquez, “ginpaidalum na siya [ang konduktor] sa preventive suspension pagkakita namon sang amo to [nga video] kay indi gid siya nami. Bisan kami nga naglantaw indi gid kami namian nga makita ang amo to nga sitwasyon. Kasakit batyagon nga gahilibiun ang isa ka pasahero.”

Nag-sorry si Marquez sa natabu kag ginpasalig nga indi ini ang ila training sa mga konduktor.

Ginpa-athag niya nga wala nagakulang ang management sa paghanas sa mga konduktor nga gina-hire.

“Before na sila [ang mga konduktor] i-hire, ginapa-undergo na sila sa values formation, proper passenger handling kag ginapadala sila sa Bacolod para mag-undergo sa enhancing program. Sa management, kumpleto kami sa kinahanglanon para mapa-improve kag mapanami ang amon nga serbisyo,” ang pahayag ni Marquez.

Ginapanugyanan ni Marquez ang may mga reklamo sa ila personnel nga magpakig-angut sa management “para matagaan namon atensyon kag matagaan namon sang disciplinary action [ang ginareklamo].”

May due process man suno sa iya nga ginahatag sa personnel nga ginareklamo kag nakadepende sa iya sala ang gina-issue nga disciplinary action.

“We do not tolerate this kind of behavior,” ang pahayag pa ni Marquez nga nagatumod sa daw arogante nga panabat sa estudyante sang ginareklamo nga konduktor. –via Aksyon Hotline