Truck nga may karga nga abono nahulog sa suba sa San Dionisio, Iloilo
Nahulog sa suba sa Brgy. Bagacay, San Dionisio, Iloilo ang truck nga may karga nga mga abono kag binhi sang mais mga kahapon.
Suno sa pahinante sang truck nga si Nathaniel Lusong, na-alang-alang sa pagkambya ang driver samtang nagapataklad sa taytay kabangdanan nga nagdalus-os ang ila salakyan kag nahulog sa suba.
Una nga nahulog ang ruweda sa likod kag bangud sa kabug-aton sang karga sang truck wala na ini makataklad tubtob nga nahulog.
Gindala naman sa ospital ang driver sang truck nga ginkilala kay Junjun Morenes matapos napilasan sa ulo sang naigo sa karsada sang naglupat siya halin sa truck.
Nagbanog naman ang wala nga tiil sang isa pa ka sakay sang truck nga ginkilala kay alyas Gian.
Ginpahayag sang pahinante nga lima ang sakay sang truck nga ginabug-usan sang driver, duha sa front seat, kag duha sa likod.
139 tanan ka sako ang karga sang truck nga ginalakipan sang mga abono, hilo para sa hilamon, kag mga binhi sang mais.