Pag-implant sang microchip sa mga ido, kuring i-pilot test sa tag-isa ka barangay sa kada distrito sa siyudad sang Iloilo
May pagahimuon nga pilot test ang Iloilo City Veterinary Office sa pag-implant sang microchip sa mga hinuptanan nga kuring kag ido sa tag-isa ka barangay sa pito ka mga distrito.
Ini ang ginpresentar sang City Veterinary Office kadungan sang ila pagsinapol sa Kalahi Program nga ginpangunahan sang City Disaster Risk Reduction Management Office (CDRRMC) sa diin gin-istoryahan nga ang microchipping ang mangin pamaagi sa pagrehistro sang mga kuring kag ido.
Suno kay Iloilo City Veterinarian Dr. Suzette Leal, ila gin-propose ang nasambit nga lihok bilang kabahin sang Animal Preparedness and Rescue.
Ginpahayag man niya nga kabahin sang Sec. 5 sang Republic Act 9248 ukon Anti-Rabies Act of 2007 ang pag-implant sang microchip.
Ang microchip ilubong sa tangkugo sang ido kag kuring kag ginpasiguro sang Department of Agriculture nga “hypoallergenic” ang mga chips.
Gin-athag ni Leal nga magaserbe nga Radio Frequency Identification (RFID) ang mga microchips kag indi Global Positioning System (GPS).
Ginkumpirmar naman niya nga nagabili sang P299 ang isa ka microchip nga kaangay sang bugas ang kadakuon.
Mabakal man sila sang scanner nga tag-P4,500.
Mahimo nga mabutang sa microchip ang pangalan sang ido; address; pangalan sang tag-iya; color sang ido ukon kuring; vaccination status kag iban pa.
Konektado sa isa ka mobile application nga puwede ma-access sang pet owners ang tanan nga mga ido kag kuring nga iya ginapanag-iyahan.
Requirement nga vaccinated ang ido kag kuring antes himuon ang procedure.
Daku naman nga bulig ang microchip ilabe na gid sa registration bangud mangin lifetime na ini kag indi madula ukon madunot suno pa kay Leal.
