Jaro Belfry gin-turnover na sa Iloilo City government
ILOILO CITY — Matapos ang siyam ka bulan nga restoration sang “Campanario de Jaro” ukon Jaro Belfry sa bulig sang National Historical Commission of the Philippines (NHCP), gin-turn over na ini sa Iloilo City Government kag sa Archdiocese of Jaro kahapon, Nobyembre 27.
Ginakabig na nga historical landmark ang Camapanario de Jaro nga gintukod pa sang 1744 kag nagserbe ini bilang religious structure kag military watchtower sang tiyempo Espanyol.
Naguba ini sang linog sang Hulyo 17, 1787 apang liwat nga ginkay-o sang 1833 sa idalum sang superbisyon ni Fr. Jesse Alvares nga isa ka Agustinian nga pari. Nakumpleto ang pagkay-o sini sang 1881 sa pagpamuno na ni Msgr. Mariano Cuartero, ang labing una nga obispo sang Jaro.
January 25, 1948 sang liwat ini nga naguba bangud sang linog nga nagtay-og sa Panay nga gintawag nga “Lady Caycay.”
Liwat nga ginkay-o ang kampanaryo sang 1990s sa idalum sang National Historical Institute agud himuon nga viewing deck kag tourist center apang wala ini matigayon bangud sa kompikto sa Archdiocese sang Jaro.
Pebrero subong nga tuig sang gin-umpisahan ang pag-restore sini sa pagpanguna sang NHCP agud mabalik ang orihinal sini nga disenyo lakip na ang pagpahamtang sang apat ka cardinal virtue statues sa apat sini ka pamusod nga nadula sang malawig nga mga tinuig.
Gintambungan ang turn over ceremony kag pag-unveil sang National Historical Landmark seal sang taga-NHCP, mga opisyal sang siyudad kag Archdiocese sang Jaro.
