Labing una nga Lechon Festival sang Santa Barbara, Iloilo ginbansagan nga “Reserved” Festival bangud sang madamo nga reklamo
ILOILO – Gin-ulan sang reklamo ang labing una nga Lechon Festival sang Sta. Barbara, Iloilo bangud madamo ang wala nakabakal sang lechon kahapon, Nobyembre 27.
Ini kasunod nga natukiban sang mga customers nga lunsay naka-reserve na ang mga ginpreparar nga mga lechon rason nga wala sang may nabakal ang mga luyag kuntani nga mag-dine in kag mag-take out.
Lakip man sa nagreklamo sa Aksyon Radyo Iloilo ang pila ka mga bumalakal halin sa iban nga banwa nga nagpadulong sa Sta. Barbara.
54 ka mga lechon ang ginpreparar sa festival pero wala ini nahaponan bangud temprano pa nga gindugukan sang mga tawo.
Dugang pa sang mga nagreklamo, sa malayo pa sila nag-park sang salakyan pero wala man lang sila may naabtan pag-abot sa venue. Madamo naman ang nagpautwas sang ila pagkadismaya sa social media kasunod sang natabo.
Bangud sini, ginbansagan sang pila ka mga tagreklamo ang festival nga “Reserved Festival.”
Una na nga ginpahayag ni Sangguniang Bayan Member kag Tourism Chairman Monmon Sodusta nga madamo na ang nag-contact sa mga lechon owners agud nga magpa-reserve sang lechon antes pa ginplastar ini sa venue.
Ginatinguhaan sang Aksyon Radyo News Team nga makuhaan sang pahayag si Santa Barbara Mayor Dennis Superficial kag ang Municipal Agriculture Officer sang amo man nga banwa.
