NPA member nga napatay sa engkwentro sa Igbaras, nakilala na
ILOILO — Nakilala na ang ginapatihan miyembro sang Communist Party of the Philippines- New People’s Army (CPP-NPA) nga napatay sa engkwentro batok sa mga katapo sang 61st Infantry (Hunter) Battalion, 3rd Infantry Division sang Philippine Army sa Sitio Gibasya, Brgy. Tigbanaba, Igbaras, Iloilo sang Sabado, Nobyembre 26.
Ginkilala ang napatay kay Domingo Costas, alyas Evan, Squad Member sang Team 1, Squad 1, sang Suyak (SDG) Platoon, Southern Front-Komiteng Rehiyon – Panay nga ginapatihan ginapangunahan ni Jun Capio, alyas RonRon.
Na-recover man ang duha ka M16A1 rifle, isa ka AK47 rifle, isa ka M203 grenade launcher, isa ka rifle grenade, kag iban pa nga paraphernalia.
Ginabanta pulo (10) ka mga miyembro sang CPP-NPA ang na-engkwentro sang mga suldado.
Nagpasalamat man si 61IB Commanding Officer, Lieutenant Colonel Harold E. Garcia sa mga residente sang lugar nga gilayon nag-report sa ila sang impormasyon nga nagapangilkil kag nagapamahog ang grupo sang mga rebelde sa ila lugar.
