4 ka salakyan nagkaralusbot sang gintiro sa City Proper

ILOILO CITY — Nakarabuslot ang apat ka mga salakyan sang gintiro sang wala makilala nga suspek samtang naga-park sa covered gym sang Barangay Monica Bluementritt, City Proper pasado las 11:00 kagab-i, Disyembre 14.

Ang mga salakyan ginapanag-iyahan nanday Fiscal Ma. Monica Espinosa, Fillmore Espinosa, kag Lovely Obligacion.

Ang pula nga Toyota Rush ginapanag-iyahan ni Obligacion, itom nga Chevrolet Sedan ang kay Fiscal Espinosa, kag puti nga Monterto Sports kag Honda CRV ang ginapanag-iyahan ni Filmore Espinosa.

Sunod-sunod nga lupok ang nabatian sang mga residente antes nadiskubrehan ang may igo sang bala ang mga salakyan.

Wala sang may napilasan sa insidente.

Wala pa makilala sang kapulisan ang suspek bangud nagpatupling sa madulom nga parte sang gym samtang ginatiro ang mga salakyan.

Nagapati naman si Fiscal Espinosa nga taga-barangay lang ang suspek.