2 patay sa hacking kag shooting incidents sa Anini-y, Antique

ANTIQUE — Duha ang patay sa nagluntad nga shooting kag hacking incidents sa Brgy. Butuan, Anini-y, sang Disyembre 14.

Suno kay Police Lieutenant Bryan Alejo, hepe sang Anini-y Municipal Police Station, ginbantayan ni Rexes Gicaraya ang biktima nga si Dennis Veloso sa guwa sang gym kag ginlabu.  

Nagbalos si Veloso paagi sa pagtiro gamit ang dala nga revolver.

Nakita sang tatlo ka kabataan ni Rexes nga sanday Rex Brian, 32; Rex Ryan, 30; kag Rexel, 27-anyos, ang natabo sa ila amay gani nagbalos man sila sa pagtiro kay Veloso. 

Lunsay patay sa insidente sanday Veloso kag Rexes.

May pilas sang pagkatiro sa agtang kag pilas sang pagkalabu sa nagkalain-lain nga parte sang lawas si Veloso, samtang may pilas naman sang pagkatiro sa ilok nga naglapus sa dughan si Rexes.

Daan nga hiligut-anon ang ginasunod nga motibo sa krimen suno kay Alejo.

Na-recover ang mga pusil nga gingamit ni Veloso kag mag-utod nga Gicaraya.       

Natalana pasakaan sang kaso nga murder ang mga suspetsado.