Private watch group Grupo Konsumedor magahingyo sa Ombudsman nga imbestigaran ang Ungka Flyover

ILOILO CITY — Mapadala sang sulat sa Ombudsman sa masunod nga semana ang Grupo Konsumedor nga isa ka private watch group agud maghingyo nga imbestigaran ang problema sa Ungka flyover.

Suno sa presidente sang grupo nga si Atty. Eldrid Antiquera, katuyuan sang ila tikang nga mahibaluan kun sin-o ang may salabton kag dapat nga pasakaan sang kaso sa pagtuhaw sang problema sa flyover. Daku suno sa iya ang epekto sini ilabe na sa mga riding public nga masami nagalabay sa lugar.

Pila pa gid sa mga rason nga ginplastar ni Atty. Antiquera amo nga wala mapuslan ang proyekto bisan nga sang Hunyo 30 pa ini natapos. Maathag man suno sa iya nga may problema sa flyover bangud sang pag-usmod sini.

Dugang niya, kuwarta sang pumuluyo ang gingamit sa pag-obra diri gani dapat lang nga may magpanabat sa problema.

Ginghangkat man ni Atty. Antiquera ang DPWH nga ipagguwa ang aktuwal nga plano sang Ungka flyover agud mahibaluan kag makumparar kun nasunod ini sang kontraktor.

Gin-athag niya nga ang paghingyo nila sang imbestigasyon, wala nagakahulugan nga may konklusyon na sila kun ano man ang problema sa flyover.

Kahigayunan ini suno sa iya agud mapaathag sang DPWH kag sang kontraktor ang ila tagsa ka mga bahin.

Dugang pa ni Antiquera, mas maayo nga ma-imbestigaran sang Obudsman ang problema bangud may kapasidad sila nga mag-obligar sa mga involved nga magpaguwa sang mga dokumento.

Ang grupo konsumedor, ginabug-usan sang nagkalain-lain nga mga propesyunal nga may katuyuan nga ipakigbato ang kinamatarong sang mga konsumedor.