#Breaking | Kaso vs Estancia Killings suspects gin-dismiss sang prosecutor bangud wala sang probable cause
Gin-dismiss sang Prosecutor ang kaso nga murder nga gin-file batok sa mga suspects sa Estancia killings bangud wala sang probable cause.
Lakip sa ginpasakaan sang tatlo ka counts sang murder amo sanday Jevron Parohinog, lone survivor sa krimen, Jix Prohinog, utod ni Jevron, Michael Porras, Michael Quiatchon, Benzen Llamado kag anum ka mga John Does.
Setyembre 14 sang kaagahon sang nasapwan sa Villa Panian, Estancia ang bangkay sang tatlo ka mag-abyan nga JP Bosque, Floyd Fernandes kag Mark Libao.
REAKSYON SANG KAMPO NI BENZEN LLAMADO
Ginkalipay naman sang kampo ni Benzen Llamado, isa sa mga akusado sa Estancia killings, ang maayo nga development sa kaso.
Suno kay Atty. Aida Rose Villanueva, legal counsel ni Llamado, mangin maayo nga paskuwa para sa iya kliyente ang amo nga balita.
Gin-ako ni Villanueva nga wala pa siya nakabaton sang kopya sang desisyon sang prosecutor sa kaso.
Ginpahayag niya nga base sa ila pag-assess sa mga ebidensya, nagpabutyag na ang iya kliyente nga may pagduha-duha siya sa pagdalahig sa iya sa kaso.
Ini bangud indi bastante ang mga ebidensya batok sa iya kliyente.
Nagapati si Atty. Villanueva nga “very much alive” ang hustisya sa pungsod kag isa diri ka pamatuod ang pagka-dismiss sang kaso batok sa iya kliyente.
Nagapati man si Villanueva nga wala na sang rason agud may i-file pa nga kaso batok kay Llamado.
