#Breaking| Lalaki ‘gin-chop chop’ sang iya kaupod sa trabaho sa Bakhaw, Mandurriao
ILOILO CITY – (Updated as of 8:24am, Dec. 21) Patay na sang nasapwan ang lalaki sa boarding house sa Barangay Bakhaw, Mandurriao subong nga aga.
Suno kay PMAJ Rey Sumagaysay, hepe sang Mandurriao Police Station, may nerbyos ang suspek nga ginkilala kay Raffy Claudio sang Janiuay.
Sang Domingo lang nag-abot sa Bakhaw, Mandurriao si Claudio suno kay Sumagaysay.
Sa pagpangusisa sang Aksyon Radyo Iloilo news team, gin-hire si Claudio kag ang biktima nga na-identify kay Ricky Pisaro sang Cabatuan agud magluto sang lechon.
Mga las-5:20 kaina sang kaagahon sang nakabati sang singgit halin sa boarding house sang biktima kag suspek.
Ginpabutyag naman ni Clemente nga “ginhalitan” siya sang biktima gani iya ginlabu. Wala na naghatag sang dugang nga statement ang suspek nga yara na sa custody sang Mandurriao police.
Na-recover naman ang ginapanglasa sang lechon nga posible gingamit sa krimen.
REAKSYON SANG ILOY SANG SUSPEK
Nagapati ang iloy ni Claudio, nga indi mahimo sang iya nga bata ang krimen kun yara siya sa insakto nga paminsaron.
Suno sa iloy nga si Henny, mabuot ang iya nga bata kag wala man sang bisyo.
Sa pagkamatuod suno sa iloy, “Kun sa akon, kun insakto ang isip ka bata ko indi na gid mabatas [ina nga obrahon]. Ang bata ko sa tuod-tuod tama ka buot.”
Dugang ni Henny, nanotisyaran niya nga nag-umpisa ang nerbyos sang iya nga bata sang nasaksihan sini ang pagtiro-patay sa iya nga amay sang 2015 sa Lambunao. Posible man nga nagdugang ang “masakit nga kamatayon” sang iya nga magulang sang 2013.
Ginpabutyag niya nga antes ang insidente, nag-istoryahanay pa sila sang iya nga bata sa cellphone kagab-i kag wala man sang may nanotisyaran nga malain.
