1 patay sang na-trap sa nasunog nga balay sa Arevalo

ILOILO CITY — Patay ang bana samtang nakaluwas ang asawa kag bata sang nasunog ang ila bungalow-type nga balay sa Barangay Quezon, Arevalo kaina sang kaagahon.

Ginkumpirmar ni Senior Fire Officer 1 Rodel Yanger sang Bureau of Fire Protection nga nasapwan nila ang lawas ni Arvin Angkay, 50-anyos, nga nagahapa sa guwa sang kuwarto.

Sa inisyal nga pagpangusisa sang BFP, ginhingagaw sang bana nga mapaguwa ang iya asawa kag tatlo ka tuig nga bata kag nagpabilin pa siya agud mapalong ang kalayo.

Wala na nakaguwa ang bana tubtob nga nagdaku ang kalayo.

Gina-imbestigaran pa sang Bureau of Fire Protection ang ginhalinan sang sunog.

Suno kay Yanger, sa ila inisyal nga pagpangusisa, nag-umpisa ang kalayo sa kuwarto sang mag-asawa nga Angkay kag naglaton sa kaiping nga mga kuwarto.

Ginpahayag sang asawa nga si Chen nga nagpanglimpyo pa sila antes nagtulog kagab-i.

Ginabanta sa P300,000 ang kahalitan sang sunog.