Bata nasamaran sang natumbahan sang kahoy ang ila balay sa Sta. Cruz, Arevalo sa paglabay sang buhawi

ILOILO CITY – Ginabanta duha ka oras antes nakuha ang bata nga na-trap sa sulod sang ila balay nga natumbahan sang puno sang Indian mango sa paglabay sang buhawi sa Barangay Sta. Cruz, Arevalo mga las-seis subong nga aga.

Suno sa iloy, may pilas sa abaga kag ulo ang siyam ka tuig nga bata nga lalaki nga gindala na sa ospital kag luwas naman sa katalagman.

Suno naman kay Maricel nga residente man sang Barangay Sta. Cruz, “gabagrong ang hangin nga may dala nga ulan” ang ila nabatyagan.

Magluwas sa Sta. Cruz, gin-report man nga naglabay ang buhawi sa Barangay Sto. Domingo, Arevalo.

May mga balay nga naguba kag mga poste kag puno sang kahoy nga natumba.

Nagapadayon ang clearing operation sang mga personnel sang Iloilo City Government kag MORE Power Iloilo sa mga areas nga na-apektuhan. –via Aksyon Hotline