Smart nag-abiso sa publiko batok sa mga nagapabayad para sa SIM card registration

ILOILO CITY — Ginadumilian sang Smart Communications ang mga fixers ukon third party entities nga nagapabayad nga magparehistro sang SIM cards.

Ini ang gin-athag ni Ms. Cathy Yang, First Vice President kag Group Head sang PLDT and Smart Corporate Communications, kasunod sang natukiban sang Aksyon Radyo Iloilo news team nga may mga Facebook accounts nga naga-offer sang assistance para sa SIM card registration kag nagasukot sang 30 tubtob 50 pesos kada SIM card.

Ginapangayo sang accounts ang mga personal information sang subscribers pareho sang valid ID, ngalan, address, birthday, contact number kag picture para sa registration.

Ginpahayag ni Yang nga istrikto nga ginadumilian sang Smart ang amo nga buluhaton bangud libre lang suno sa iya ang gina-offer nga serbisyo sang telco para sa SIM registration.

Nagpanugyan si Yang sa mga subscribers nga i-report sa ila ang mga FB accounts nga nagapabayad para sa SIM registration agud ila nga ma-aksyonan.