SILG Benjamin Abalos, Jr. nagpanawagan sa mga police colonels kag generals nga magsumiter sang courtesy resignation sa tunga sang posible drug links
Nagpanawagan si Department of the Interior and Local Government ukon DILG Secretary Benjamin “Benhur” Abalos, Jr. sa tanan nga colonels kag generals sang Philippine National Police nga magsumiter sang ila courtesy resignations bilang kabahin snag pagpaninguha sang gobyerno nga madula sa PNP ang mga opisyales nga involved sa illegal drug trade.
Sa press conference kahapon, gin-athag ni Abalos nga ang paghingyo niya sang courtesy resignation sa mga PNP officials ang madasig nga pamaagi agud ma-address ang problema sa illegal drugs sa pungsod.
Nagaguwa suno sa iya sa monitoring nga may mga heneral kag colonel nga involved sa illegal drugs.
May committee naman nga maga-assess sa profile sang mga sa PNP official nga maga-resign suno pa kay Abalos.
Madumduman nga indi ini ang una nga tiun nga naladahig sa drug syndicate ang mga high-ranking officials sang PNP.
Sa tiun sang termino ni former President Rodrigo Duterte, ginmitlang niya ang pila ka PNP generals nga ginapatihan involved sa illegal drug trade.
MAGA-COOPERATE ANG PNP
Ginpasiguro sang PNP Public Information Office Chief, Police Colonel Redrico Maranan ang kooperasyon sang PNP sa panawagan ni Interior Secretary Abalos, Jr.
Ginpahayag ni Maranan nga nahibaluan nila nga para sa kaayuhan sang organisasyon kag sang pungsod ang desisyon sang DILG secretary.
Nagbalibad naman nga magsabat si Maranan sa pamangkot kun ano ang mangin implikasyon sang panawagan ni Abalos sa organisasyon.
