Masobra 100 ka traffic violators nadakpan sang PSTMO sa 3 ka adlaw nga operasyon sa siyudad

ILOILO CITY — Wala naga-untat ang sa Public Safety and Transportation Management Office (PSTMO) kag kapulisan sa pag-operate batok sa mga salakyan kag motorsiklo nga may magahod nga tambutso sa Iloilo City.

Suno kay PSTMO head Jeck Conlu, malapit na sa 100 ka mga traffic violators ang na-apprehend nila sa tatlo ka gab-i nga operasyon sa diin 35% diri ang may magahod nga tambutso.

Ginpabutyag ni Conlu nga madamo sang nagamotorsiklo kun gab-i nga wala nagagamit sang helmet kag wala sang driver’s license.

Ginpahayag man niya nga road safety campaign na ang ila ginapatuman bangud base sa iya obserbasyon, isa ang motorsiklo sa masami nga involved sa mga aksidente.

Magluwas sa magahod nga tambutso, madamo man sang mga traffic violations sa ila operasyon kun gab-i tubtob kaagahon.

Sa pagkamatuod suno pa kay Conlu, may pila pa ka mga drivers nga ginalagas sang kapulisan bangud nagapalagyo.

Sang damlag lang, nagmandu si Mayor Jerry Treñas sa PSTMO nga padayunon ang operasyon batok sa mga salakyan nga may magahod nga tambutso.