Barangay kagawad sa Molo arestado sa pagpanghimulos sa iya bata

ILOILO CITY — Arestado ang barangay kagawad sa Molo sang ginserbihan sang warrant of arrest sa kaso nga pagpanghimulos sa iya bugtong nga bata nga babaye.

Suno kay Lt. Marion Asparo, deputy chief-of-police sang Molo Police Station, magluwas sa qualified rape, may kaso pa nga acts of lasciviousness kag qualified sexual assault nga gin-file ang tagreklamo batok sa iya amay.

Dugang pa ni Lt. Asparo, 2014 sang nag-umpisa ang pagmalisya sang kagawad sa iya bata sang 10 pa lang ka tuig ang tagreklamo.

2021 sang gin-file ang kaso batok sa kagawad kag kahapon lang, Enero 10, nagguwa ang warrant of arrest.

Ginpahayag ni Lt. Asparo nga nagpangayo sang bulig sa iya lola ang tagreklamo agud mapasaka ang kaso bangud may impormasyon nga indi magpati ang iya iloy sa reklamo.

Yara subong sa kustodiya sang iya nga lola ang tagreklamo.

Nagpamalibad nga maghatag sang statement ang kagawad sang gin-interview sang Aksyon Radyo Iloilo news team.